Цэнтр вывучэння гісторыі і культуры яўрэйства на Беларусі Еўрапейскага гуманітарнага універсітэта мае гонар прадставіць чытачу акадэмічнае выданне, што прысвечана розным аспектам даследванняў у галіне іудаікі, штогоднік «Цайтшрыфт». Рэдакцыйная калегія разглядае дадзенае выданне як працяг старых традыцый беларускай іудаікі, што былі закладзены часопісам «Цайтшрыфт», які выдаваўся яўрэйскім аддзелам/сектарам Беларускай Акадэміі навук у 1926–1931 гг. Тады Менск па праву быў адным з цэнтраў яўрэйскага культурнага і інтэлектуальнага жыцця. З’яўленнем новага навуковага часопіса выдаўцы паспрабавалі абазначыць стан беларускай і ўсходне‑еўрапейскай даследчыцкай думкі па некаторых актуальных праблемах іудаікі ў новых умовах развіцця гуманітарнай навукі на мяжы ХХ–ХХІ стст. І таму калектыў яўрэйскага цэнтра ЕГУ прадстаўляе той жа самы «Цайтшрыфт», але ў новым, сучасным фармаце. (Ад рэдакцыйнай калегіі).