Пры спробе асэнсаваць падзеі з Найноўшае гісторыі Беларусі надыходзіць пачуцьцё сутыкненьня зь нейкай новай рэальнасьцю. На тле маналітаў Бэсэсэр, расейскай акупацыі, камуністычнай ідэалёгіі да канца незразумелымі выглядаюць праявы незалежнай грамадзкай актыўнасьці. Першыя знаёмствы з гэтымі сьведчаньнямі могуць прынесьці адчуваньне сэнсацыі. Ужо потым узьнікае жаданьне злучыць гэтыя роз-ныя фрагмэнты гісторыі, жаданьне знайсьці нейкую цэльнасьць і разам з тым сэнс, які, падобна, яшчэ прыхаваны ад нас. Нешта ёсьць тое, чаго мы ня ведаем. Магчыма, існуе нейкі тайны тэкст, які можа растлумачыць нам чалавечыя жаданьні, зьнешні канфармізм, прагу свабоды, адчайныя ўчынкі. (Найноўшая гісторыя: новы патас, фрагмент)