Гісторыя беларускай літаратуры (XVIII–XIX стст.)

Гісторыя беларускай літаратуры XVIII–XIX стагоддзяў – адна са складковых частак агульнага курса гісторыі беларускай літаратуры, які выкладаецца ў вышэйшых навучальных установах Рэспублікі Беларусь. Даследаванні беларускай літаратуры XVIII–XIX стагоддзяў з кожным годам пашыраюць яе кантэкст. А гэта патрабуе стварэння новай канцэпцыі літаратурнага працэсу XVIII–XIX стагоддзяў у Беларусі. Грунтуючыся на тым лепшым, што было ў папярэдніх праграмах, і ўлічваючы найноўшыя дасягненні беларускай літаратуразнаўчай навукі, складальнікі Праграмы падаюць акрэслены перыяд літаратуры як “Новую беларускую літаратуру” (маючы на ўвазе, што папярэдні этап – літаратура XI–XVII стст. – гэта “Даўняя беларуская літаратура”, а літаратура ад пачатку ХХ ст. – “Навейшая беларуская літаратура”).