Гэта праца з'яўляецца першай спробай манаграфічнага даследавання беларускіх песень і казак — самых папулярных жанраў нашай народнай творчасці, у якіх найбольш поўна і ярка адлюстраваны жыццё і дзейнасць працоўных, пачынаючы са старажытных часоў і канчаючы нашымі днямі. Кніга складаецца з двух раздзелаў («Беларускія песні» і «Беларускія казкі»), што аб'ядноўваюцца ўводзінамі і заключэннем. Кожны раздзел мае свае часткі, у якіх у той ці іншай ступені асвятляюцца амаль усе разнавіднасці песеннай і казачнай творчасці, адлюстроўваецца іх шлях развіцця, жанравыя і мастацкія асаблівасці, значэнне гэтай творчасці народа для мінулага і для нашага часу. Работа ў цэлым мае навукова-папулярны характар. Яна разлічана на шырокія колы чытачоў, на ўсіх тых, хто любіць і шануе родную культуру.