Развітанцы

Дэбютны зборнік паэта склалі больш за шэсць дзясяткаў вершаў, напісаных у апошнія гады. Асноўная тэма першага зборніка Мікіты Найдзёнава – каханне. Мужчынска-жаночым узаемінам прысвечана большасць старонак “Развітанцаў”, прычым вырашаецца тэма ў даволі нестандартным для беларускай паэзіі ключы, а менавіта – эратычным. Часам паэт балансуе на мяжы дазволенага, раз-пораз заходзячы за яе. У інтымна-эратычнай балансіроўцы Найдзёнаву дапамагае эзопава мова, замоўчванні, алюзіі і метафары, дзякуючы чаму рызыкоўная тэма вуалюецца і не падаецца наўпростава-пляската. Немалое ўменне паэт паказвае пры выбары рыфмаў, імкнучыся пазбавіцца зацяганых і штампаваных дзеяслоўных – на карысць складаных, скразных сугуччаў. Гульня з паэтычным словам адпавядае і гуллівай інтанацыі інтымнай лірыкі.