Цяжка ўявіць, з якіх старадаўніх часоў на тэрыторыі Мастоўшчыны жылі людзі. Хто яны, чым займаліся тыя, хто ступаў па нашай зямлі стагод­дзе, пяць ці нават тысячы гадоў таму? Па сённяшні дзень знаходзяць мае землякі помнікі каменнага веку. Калі мы прыпыніліся ў вёсцы Выгода, мясцовы настаўнік расказаў, што тут, на левым беразе ракі Зяльвянка, знойдзены аскепкі штрыхаванай керамікі познябронзавага часу. А на калгасным полі мясцовы жыхар знайшоў каменную свідраваную сякеру. Гэта было ў 1995 годзе. Сякеру, на жаль, мы не бачылі, бо яна знаходзіцца ў Гродзенскім дзяржаўным гісторыка-археалагічным музеі. Але мы ўявілі тых магутных і мужных людзей, якія ў даўнія часы карысталіся такімі прыладамі.Ідзем далей — падарожжа захапляе! Вёска Плябанаўцы, Пескаўскі сельсавет. Падыходзім да касцёла.