Дажыць да зялёнай травы...

Гэтая кніга унікальная не толькі таму, што ўпершыню ў кніжным выданні пададзена эпісталярная спадчына Васіля Быкава і Рыгора Барадуліна, але і таму, што лісты, надрукаваныя тут, падчас не саступаюць лепшым прыкладам эпісталярнага жанру класічнай літаратуры, яны нагадваюць прыватны дзённік, які дае найбольш поўнае ўяўленне і пра адносіны двух выдатных сучаснікаў, і пра невядомыя старонкі іх жыцця, і пра той драматычны час, у якім пісьменнікі жылі, ствараючы сваю непадуладную гэтаму часу літаратуру. Нарэшце, унікальнасць кнігі і ў тым, што ў кнізе таксама ўпершыню найбольш поўна падаюцца выяўленчыя працы В. Быкава, якія ці спецыяльна ствараліся да «Лістоў у Хельсінкі» Р. Барадуліна, ці захоўваюцца ў якасці каштоўных накідаў у нататніках паэта.