Вы прыступаеце да вывучэння геаграфіі сваёй краіны, сваёй Бацькаўшчыны — Беларусі. Да прыкладаў з геаграфіі Беларусі, да краязнаўчага матэрыялу вы звярталіся на ўсім працягу вывучэння школьных геаграфічных курсаў. Цяпер вы зможаце сістэматызаваць і абагульніць свае веды аб прыродзе, насельніцтве і гаспадарцы Беларусі, даведацца шмат новага, навучыцца выконваць заданні і разлікі па аналізу сувязяў паміж геаграфічнымі аб’ектамі, апрацоўцы статыстычных паказчыкаў. У выніку вы атрымаеце больш поўныя і дэталёвыя звесткі па геаграфіі роднага краю.