Як прайшлі «Маршы суседзяў» на 113-ты дзень пратэстаў супраць гвалту і фальсыфікацыі выбараў

У розных раёнах Менску адбыліся дзясяткі маршаў пратэсту. У іх прынялі ўдзел дзясяткі тысяч чалавек. У самых буйных маршах удзельнічала па некалькі тысяч чалавек.

Сілавікі езьдзілі па Менску на аўтобусах і разганялі людзей, але тыя зноў фармавалі калёны на бліжэйшых вуліцах. Разагнаць усе маршы яны не змаглі.

Сілавікі ўжывалі сьвятло-шумавыя гранаты і газ у Менску і Менскім раёне. Паведамляецца аб некалькіх пабітых дэманстрантах, якія страцілі прытомнасьць ля мэтро «Пушкінская», на Партызанскім праспэкце, ля гандлёвага цэнтра «Рыга» ў Менску.

Акцыі пратэсту прайшлі таксама ў Берасьці, Горадні, Гомлі, Магілёве, Віцебску, Жодзіне, Смалявічах, Дзяржынску, Бараўлянах, Радашковічах, Ляхавічах і іншых гарадах.

На гэты момант праваабаронцам вядома 170 імёнаў затрыманых.