Уручылі літаратурную прэмію «Гліняны Вялес»

Па словах заснавальніка Алеся Аркуша, прэмія з’яўляецца найстарэйшай літаратурнай узнагародай сучаснай Беларусі. Штогод «Гліняным Вялесам» узнагароджваюць найлепшага літаратара прамінулага года. Лаўрэатам сёлеташняй прэміі стаў пісьменнік Аляксандр Лукашук з кнігай «Палёт Матылька». Твор пабачыў свет у серыі «Бібліятэка «Свабоды» і напісаны ў жанры нон-фікшн, альбо літаратурнай журналістыкі. Прэзентацыя кнігі і ўручэнне прэміі «Гліняны Вялес» стала сапраўдным святам, як кажа ўганараваны літаратар Аляксандр Лукашук.

- Мне шкада, што слухачы Радыё Рацыя не могуць прысутнічаць і чуць тое, што людзі гаварылі, спявалі і чулі. Можна сказаць, што гэта было свята. І як пасля любога свята, памяць пра яго застаецца і дае зусім новую энергію, якая дапамагае пасля зусім іначай пабачыць, запісаць і сказаць.

Літаратурную імпрэзу прэміі «Гліняны Вялес» наведалі з выступамі шматлікія беларускія літаратары, між якіх Уладзімір Арлоў, Анатоль Вярцінскі, Валянцін Акудовіч і іншыя. Адбыліся ўручэнне «Глінянага Вялеса» і прэзентацыя новай кнігі Аляксандра Лукашука ў кнігарні выдавецтва «Логвінаў» у Мінску. Прэміі «Гліняны Вялес» уручалася ў 19-ты раз. Цяпер заснавальнікі прэміі рыхтуюцца да юбілейнай 20-й прэміі.

Аляксей Красоўскі, Радыё Рацыя