Леанід Несцярчук сустрэўся з чытачамі

У Брэсце адбыліся сустрэчы з гісторыкам, аўтарам кніг пра Напалеона Орду, Тадэвуша Касцюшку і Станіслава Панятоўскага Леанідам Несцярчуком. Удзельнікі мерапрыемстваў былі розныя - ад студэнцкай моладзі да прадстаўнікоў нацыянальных меншасцяў.

Сябры рускага таварыства зацікавіліся апошняй працай Леаніда Несцярчука “Станіслаў Аўгуст Панятоўскі: манарх, асветнік, мецэнт”. Адмыслова для іх прайшла прэзентацыя фільма па кнізе. Гісторык, кажа, што попыт на такія кнігі ёсць:

- Пісаць трэба праўдзівую гісторыю, якая б яна не была – дрэнная, чыстая, апаганеная – але гэта наша гісторыя. Яе пісаць трэба дастаткова смела, вызваляць ад непатрэбных напластаванняў, і стаць на шлях нацыянальнай гісторыі, таму я займаю такую пазіцыю, і я не памыліўся, шмат каму я адкрываю вочы на сваю гісторыю, на сваю Бацькаўшчыну.

Знайсці ў кнігарні выданні Леаніда Несцярчука складана, бо нават апошнюю кнігу пра Станіслава Панятоўскага разбіралі на заказ. Аўтар упэўнены, што калі ствараць якасны беларускі прадукт, то попыт будзе.

Зміцер Кісель, Радыё Рацыя.