Літаратурны конкурс “Дэбют” прымае працы да 15 лістапада

Працягваецца набор твораў на літаратурны конкурс “Дэбют”, арганізаваны рэдакцыяй тыднёвіка беларусаў у Польшчы “Ніва” і Беларускім саюзам у Польшчы.

Гэта 13-ты па ліку агульнапольскі конкурс беларускай паэзіі і прозы, які накіраваны на непрафесійных аўтараў з Польшчы, якія пішуць свае творы на беларускай мове або на гаворцы.

Па словах галоўнага рэдактара тыднёвіка “Ніва” Яўгена Вапы, конкурс “Дэбют” ахоплівае ўсе ўзроставыя групы аўтараў:

– Ёсць дзве катэгорыі: катэгорыя “школьная” і катэгорыя людзей дарослых, у якую ўваходзяць ужо студэнты і ўсе дарослыя. Ёсць толькі адно абмежаванне – не могуць у ім прымаць удзел людзі, якія займаюцца літаратурай прафесійна. Гэта ёсць “Дэбют”, а значыць ён для тых, хто піша для сябе, піша для іншых, але не з’яўляецца сябрам прафесійных літаратурных аб’яднанняў.

Свае конкурсныя працы ў форме паэзіі або прозы можна дасылаць у рэдакцыю “Нівы” да 15-га лістапада гэтага года. E-mail: redakcja@niva.iig.pl

Падвядзенне вынікаў конкурсу ды ўручэнне ўзнагародаў запланаванае напрыканцы лістапада. Лепшыя творы надрукуюцца таксама на старонках тыднёвіка “Ніва”.