Актывісты БХД праспяваюць зняволеным калядкі

Актывісты Беларускай хрысціянскай дэмакратыі (БХД) заклікалі духавенства розных канфэсій аказаць салідарнасць са зняволенымі, наведаць іх у турмах ды падтрымаць маральна, асабліва ў святочны час.

Як паведаміў Дзяніс Садоўскі з БХД, ініцыятары акцыі хутчэй за ўсё могуць разлічваць на зразуменне сярод ніжэйшага духавенства і вернікаў:

– Мы звярнуліся да святароў, мы звярнуліся да вышэйшага духавенства, каб яны далі нейкі загад альбо просьбу да сваіх святароў, і каб яны пайшлі ў турмы да людзей, да хрысціян, якія там зараз сядзяць, напярэдадні вялікага свята – павіншаваць іх, памаліцца разам з імі. Пакуль што, пазіцыя даволі нейтральная кіраўніцтва канфесій, на жаль. Святары на месцах, яны больш адкрыта адгукаюцца і мы спадзяемся, што сённяшняя акцыя адбудзецца з удзелам святароў.

Незалежна ад паводзінаў святароў, актывісты БХД самі яшчэ сёння збіраюцца перадаць зняволеным Бібліі і дробныя падарункі і ўвечары праспяваць ля турмы на Акэсціна калядкі.