“Спакушэнне” Барыса Пятровіча

Новая кніга празаіка Барыса Пятровіча (Сачанкі) пад назвай “Спакушэнне” выйшла днямі ў мінскім выдавецтве “Кнігазбор”. Зборнік склалі найлепшыя апавяданні з усяго творчага набытку пісьменніка, выбранае з кнігаў "Ловы", "Сон між пачвар", "Фрэскі", "Шчасьце Быць...", а таксама кароткая проза напісаная ў апошні час.

Паводле анатацыі “героі твораў балансуюць на мяжы явы і сну, адчаю і надзеі, мінулага і будучыні, хаосу і гармоніі, кахання і...”

З 1 чэрвеня зборнік “Спакушэнне” можна будзе купіць у кнігарнях.

Урывак з кнігі «Спакушэнне»

(апавяданне “Неба пад нагамі і вакол”)

“Найпрасцей у падобных выпадках рабіць гэта не сур’ёзна, а паўжартам. Я падышоў да вакна, адкінуў фіранку і спытаў у Арыны:

— Ты ведаеш, дзе я жыву?

— Не.

— Вунь гарыць маё вакно.

— Дзе?

— Зірні. У доме насупраць. На сёмым паверсе.

— Дык ты маніў, што жывеш адзін?

— Я казаў праўду: я жыву адзін. Паглядзі, якое вакно самотнае...

— А чаму ж святло гарыць, калі там нікога няма? Склероз?

— Я спецыяльна святло пакінуў, каб быў мне арыенцір. Я пайду зараз дамоў напрасткі, з твайго вакна...

Арына засмяялася:

— Дзіўны вы народ, мужчыны, чаго толькі не прыдумаеце, абы здавацца ў вачах жанчыны героямі, ці хоць бы не звычайнымі, не з-пад плоту...

— А давай пойдзем у заклад, што я вярнуся дамоў проста з твайго вакна...”

Прэсавая служба СБП