Святло “Святліцы”. У Магілёве пабачыў свет зборнік маладых паэтаў

15 траўня стала сапраўдным святам для ўдзельнікаў магілёўскага гарадскога літаратурнага клуба “Святліца” Цэнтра творчасці дзяцей і моладзі “Агат”.

Ва ўрачыстай атмасферы была прэзентавана кніга “Святло “Святліцы” з творчымі работамі маладых паэтаў, якія на працягу навучальнага года спрабавалі свае здольнасці ў вершаскладанні пад кіраўніцтвам паэтэсы, настаўніка вышэйшай катэгорыі, сябра ГА “Саюз беларускіх пісьменнікаў” Тамары Пятроўны Аўсяннікавай.

Нямала намаганняў было прыкладзена як кіраўніком літаратурнага клуба, так і самімі навучэнцамі, каб  асэнсаваць пачутае, зразумець сябе часткаю прыроды, натхніцца і напісаць першы верш, няхай яшчэ кволы, недасканалы.

Гэта адзначылі і паважаныя госці,  паэты Эдуард Мядзведскі і Надзея Палубінская, якія прыйшлі падтрымаць маладых аўтараў, паслухаць іх, а таксама прачытаць свае творы.

Прыемна адзначыць, што актыўны ўдзел у творчым жыцці сваіх дзяцей прымаюць іх бацькі. На сустрэчу прыйшлі Ліліт Папікян, Алена Міхайлава, Анжаліка і Аляксандр Волкавы, якія выказалі словы ўдзячнасці за працу клуба.

Спадзяемся, што "Святло Святліцы" гэта хоць і першае, але не апошняе выданне маладых літаратараў гарадскога клуба. Жадаем удзельнікам гэтага творчага аб’яднання натхнення, творчых поспехаў, новых вершаў.

Ул. інф. Магілёўскага абласнога аддзялення СБП

Фотаздымкі Максіма Камарова