21 снежня плануецца мірная акцыя на Акрэсціна

Мірная акцыя ля спецпрыёмніка-размеркавальніка на Акрэсціна пройдзе заўтра ў 18 гадзінаў, з патрабаваннем вызвалення затрыманых на Плошчы Незалежнасці  актывістаў і кандыдатаў у прэзідэнты.

Пра гэта паведаміў Франак Вячорка. Тое, што адбылося на плошчы 19 снежня паказала, што мы - народ, які імкнецца да свабоды, і гэтага імкнення Аляксандр Лукашэнка не зможа спыніць шчытамі АМАПаўцаў і спецназа, кажа актывіст:

- У 18 гадзін адбудзецца мірная акцыя з запальнічкамі, ліхтарыкамі, бенгальскімі агнямі, каля прыёмніка-размеркавальніка па вуліцы Акрэсціна. Мы павінны быць з тымі, хто стаўся ахвярамі брутальна разагнанай акцыі і паказаць, што іхняя ахвяра не дарэмная.

Франак Вячорка адзначае, што такая мірная акцыя ля Акрэсціна магчыма не прынясе ніякіх рэзультатаў, аднак неабходна праявіць салідарнасць з тымі, хто зараз знаходзіцца за кратамі, кандыдатамі ў прэзідэнты і звычайнымі жыхарамі сталіцы, якія часта выпадкова трапілі ў рыкі АМАПа.

Валянціна Лаеўская, Радыё Рацыя.