У Беластоку гукалі вясну

Пірожнае ў выглядзе бусловых лапаў, вогнішча, карагоды ды веснавыя песні. Студэнты беларускай філалогіі ў Беластоку правялі інсцэніроўку абрада “Гуканне вясны”. Па словах супрацоўніцы кафедры беларусістыкі Ганны Грэсь, у час сустрэчы студэнты хацелі наблізіць да беластоцкіх ліцэістаў і школьнікаў беларускія народныя абрады.

- Сутнасць свята ў тым, што мы хочам паказаць беластоцкай моладзі, якая вучыцца ў ліцэях і ў пачатковай школе, абрад “Гуканне вясны” супольна з расійскай філалогіяй, супольна з “Масленіцай”. Паказаць падабенствы, адрозненні, усе забавы, усе традыцыі і абрады, якія былі калісьці і сёння адбываюцца на нашых землях.

У час мерапрыемства былі падрыхтаваныя загадкі ды гульні, звязаныя з абрадам “Гуканне вясны”. Кожны змог таксама паспрабаваць галёпаў - традыцыйных булачак у выглядзе бусловых лапаў.

Уля Шубзда, Беларускае Радыё Рацыя, Беласток

Фота аўтара