Мацкевіч Уладзімір нарадзіўся ў 1956 годзе ў Сібіры ў сям'і рэпрэсаваных беларусаў. Уся сям’я вярнулася ў Беларусь у кастрычніку 1966 года і пасялілася ў Гродне. Вучыўся ў Леніградскім універсітэце і быў вучнем Георгія Шчадравіцкага, удзельнікам Маскоўскага метадалагічнага гуртка.

У Беларусь вярнуўся ў 1994 годзе, заснаваў Агенцтва гуманітарных тэхналогій і аб'явіў праграму Культурнай палітыкі па пераўтварэнні Беларусі ў сучасную дэмакратычную краіну. Дэвіз і сутнасць гэтай праграмы – Думаць Беларусь!

У 1994—1997 гадах быў распрацоўшчыкам, аўтарам і вядучым трох цыклавых перадач на беларускім тэлебачанні: «Гэта мы не праходзілі», «Выбар». З 2012 года — вядучы праграмы «Размова дня» тэлеканала «Белсат».

Быў ініцыятарам і ўдзельнікам «Менскага філязофскага кола» — творчага аб’яднання мінскіх гуманітарыяў, якое дзейнічала ў др. пал. 1990-х — пач. 2000-х гадоў. Удзельнічаў у працы над складаннем «Новейшего философского словаря» и «Всемирной энциклопедии».

У 2010 годзе заснаваў Лятучы ўніверсітэт. Чытае лекцыі, вядзе курсы і семінары.

З’яўляецца аўтарам кніг і вялікай колькасці публіцыстычных артыкулаў і каля 50 навуковых прац па пытаннях палітыкі, культуры і трансфармацыі адукацыі.

Жыве ў Мінску.