Валянцін Фёдаравіч Голубеў (нар. у 1955, г. Крывы Рог, Днепрапятроўская вобласць, Украіна) — беларускі гісторык, кандыдат гістарычных навук. Старшы навуковы супрацоўнік Інстытута гісторыі Нацыянальнай акадэміі навук Беларусі.

Працаваў плітачнікам-абліцоўшчыкам ў будаўнічым трэсце ў г. Светлагорску (Гомельская вобласць), служыў у войску. У 1981 г. скончыў гістарычны факультэт Беларускага дзяржаўнага універсітэта. Праходзіў навуковыя стажыроўкі ў Жэнеўскім, Беластоцкім, Варшаўскім, Ягелонскім, Пазнанскім універсітэтах, Вільнюскім педагагічным універсітэце.

У 1990 — 1995 гг. быў дэпутатам Вярхоўнага Савета Рэспублікі Беларусь XII склікання, сакратаром пастаяннай камісіі па міжнародных і знешнеэканамічных сувязях. Адзін з аўтараў Дэкларацыі аб дзяржаўным суверэнітэце Беларусі. З'яўляўся членам рабочай групы па падрыхтоўцы праекта Канстытуцыі Рэспублікі Беларусь 1994 г.

У 2006 г. стаў першым лаўрэатам акадэмічнай узнагароды імя Льва Сапегі, прысуджанай вучонай радай з прадстаўнікоў Ягелонскага, Беластоцкага, Варшаўскага, Пазнанскага і Вроцлаўскага універсітэтаў. Даследуе пытанні сацыяльна-эканамічнай і канфесіянальнай гісторыі Беларусі XVI - XVIII стст., культуры, унутранай і знешняй палітыкі Беларусі XX ст.