Дзеля таго, што вакол пытаньня пра нашыя нацыянальныя назовы апошнім часам нарасла цэлая маса непаразуменьняў і сьведамых хвальшаваньняў ды перакручваньняў із спэцыяльнаю мэтаю поўнага дэзарыентаваньня шырэйшага грамадзтва (як свайго, так навет і чужога) — зусім на часе выданьне ў ведамай форме «Белае кнігі», якая, наколькі мага, прычынілася-б да ўстанаўленьня фактычнае праўды ў гэтай справе. Із тэхнічных прычынаў нашая «Белая Кніга» можа выходзіць тымчасам толькі выпускамі. Прапанаваны тут 1 выпуск зьмяшчае, як уводзіны, паданы ў форме тэзаў скандэнсаваны агляд усяго палажэньня ў галіне нашых нацыянальных назоваў. Да друку падрыхтаваныя й наступныя выпускі — другі, які зьмяшчае матар’ялы з бальшавіцкіх крыніцаў, і трэйці, складзены з матар’ялаў мастацкае літаратуры.