Гэтую кніжку марна шукаць на паліцах бібліятэк і кнігарняў, бо яна існуе толькі ў 3-х друкаваных экзэмплярах і ў рукапісах. Чытачы ж маглі пазнаёміцца з ёй праз часопіс «Па-суседску», дзе кніга друкавалася ў перакладзе на польскую і праз раённую газету «Навіны Камянеччыны», дзе твор публікаваўся ў асобных частках па-беларуску. Аўтарам кнігі «Жыццё і смерць апошняга польскага караля Станіслава Аўгуста Панятоўскага» з'яўляецца краязнаўца і даследчык з Камянца Георгі Мусевіч. Шмат гадоў заняло Георгію Сцяпанавічу грунтоўнае даследаванне, параўнанні, высновы ды цяжкая крапатлівая праца, якая вылілася ў кнігу. Да апісання і даследавання жыцця і дзейнасці апошняга польскага караля падыходзілі многія масцітытя гісторыкі і даследчыкі як з Польшчы, так і з Беларусі, але ўсе іх даследаванні былі няпоўнымі, аднабаковымі і часам супярэчлівымі. Георгі Мусевіч адкрывае постаць Станіслава Аўгуста не прабуючы ацаніць яго ўклад у развіццё і заняпад Польскай дзяржавы. Адкінуўшы ўсё пазітыўна-негатыўнае, пра што распісваліся даследчыкі, Георгі Сцяпанавіч апісаў асобу, ураджэнца Камянеччыны, постаць чалавека з ўсімі яго заганамі і пазітывамі. (Н.Г.)