Выпадак

Паэт і празаік Юрка Лявонны (сапр. Леанід Юркевіч) нарадзіўся 16 (29) ліпеня 1908 года ў мястэчку Чавусы Магілёўскай губерні ў сям’і служачага. Скончыў Магілёўскі педагагічны тэхнікум, у 1934 годзе — крытыка-творчае аддзяленне літаратурнага факультэта Вышэйшага педагагічнага інстытута ў Мінску. Працаваў у рэдакцыях газет «Магілёўскі селянін», «Звязда», часопіса «Работніца і калгасніца Беларусі», на Беларускім радыё. Лірыка Ю. Лявоннага напоўнена адчуваннем радасці жыцця, рамантычнай маладосці, камсамольскай баявітасці. У многіх вершах апявалася прыгажосць беларускай прыроды, любоў да радзімы, вернасць інтэрнацыянальнай дружбе. Пісьменнік часта ездзіў па Беларусі, бываў у іншых савецкіх рэспубліках, вылучаўся сваёй грамадзянскай актыўнасцю, быў папулярным і ўплывовым паэтам, крытыкам і нарысістам. 30 кастрычніка 1936 года быў беспадстаўна арыштаваны органамі НКУС і праз год турэмнага зняволення 29 кастрычніка 1937 года расстраляны ў Мінску, магчыма, у Курапатах. Было яму толькі 29 гадоў.


        Увесь твор у адным файле