Смага падарожжаў, якую я адчуваў у сваёй душы ад нараджэння і пачаў здавальняць ужо ў ранняй маладосці, ніколі не была для мяне данінай модзе. Ва ўсіх нас у той ці іншай ступені існуе жаданне пабачыць свет, які ўяўляецца нам цямніцай, бо мы не выбіралі яго сваім прыстанішчам, аднак я, мабыць, не змог бы са спакойнай душой пакінуць гэты цесны маленькі свет, не даследаваўшы ўсе яго куткі. Чым больш назіраю я сваю турму, тым больш прыгожай і прасторнай становіцца яна ў маіх вачах. Дэвіз вандроўцы – бачыць, каб ведаць, – гэта мой дэвіз; я не выбіраў яго, ён падказаны мне прыродай.