Як гісторыя ўплывае на сучаснасць

З 1998 г. праграма “Блізкая гісторыя” пры Грамадскім аб’яднанні “Дыярыуш” праводзіць конкурсы па сучаснай гісторыі для моладзі Беларусі. Удзельнікаў конкурсаў “Блізкая гісторыя” яднае любоў да Радзімы, неабыякавасць да людзей, да іх мінулага і сучаснасці, імкненне да актыўнай грамадзянскай пазіцыі. Шмат хто з ранейшых канкурсантаў бярэ ўдзел у наступных нашых мерапрыемствах і прыцягвае новых калег, а скончыўшы школу, становіцца куратарам прац новых удзельнікаў, каб не губляць цікавых сувязяў, не адлучацца ад захапляльнай справы — пошуку гістарычнай праўды. Менавіта прапановы ўдзельнікаў конкурсаў праграмы “Блізкая гісторыя” падштурхнулі да ідэі стварэння пастаянна дзейнага асяродку “Блізкай гісторыі”, дзякуючы якому ўдзельнікі конкурсаў, і не толькі яны, маглі б атрымліваць неабходную інфармацыю і кваліфікаваную метадычную дапамогу, весці дыялог і наладжваць новыя кантакты, разам вучыцца разумець гісторыю і сучаснасць. Менавіта форма клуба падалася найбольш адэкватнаю нашым задачам.