Беларуска-літоўскія летапісы і польскія хронікі

Найбольш даўнія перыяды гісторыі Беларусі ў большай ступені вядомы толькі з пісьмовых крыніц. Нават даты заснавання гарадоў часцей вызначаюцца не з археалагічных даследаванняў, а з моманту першага ўпамінання ў летапісах, або іншых пісьмовых крыніцах. Тым не менш, часта падыход да стварэння летапісаў быў даволі суб'ектыўны, акрамя таго аўтары "грашылі", выказваючы або сваё меркаванне, або "патрэбныя, ці правільныя" звесткі ў сваіх творах. Тым не менш, даследчыкі менавіта праз напісанае ведаюць пра шматлікія падзеі ў гісторыі Беларусі, асабліва ранніх перыядаў Сярэднявечча. Аўтар, даследуючы першакрыніцы, канстатуе, што непасрэдна беларускіх твораў старажытнасці засталося не так шмат, да чаго спрычыніліся безупынныя войны, але, за тое, некранутымі засталіся польскія хронікі, якія адхіляюць завесу таямніцы супольнай гісторыі. Аўтар даследуе розныя крыніцы, а таксама тыя, якія на дадзены момант не захаваліся, але існаванне якіх пацверджана іншымі пісьмовымі крыніцамі. (Н.Г.)