Многія беларускія эмігранты, якія трапілі за мяжу яшчэ ў мінулым стагоддзі, сёння даволі вядомыя асобы не толькі ў Беларусі, але і ў тых краінах, дзе апынуліся. Прычыны эміграцыі былі розныя. Пішучы кнігу “Беларускае студэнцтва на чужыне” Барыс Рагуля ставіў перад сабой задачу высвятліць не мэты і прычыны эміграцыі, а асвятліць часы студэнцтва, навучэнства Аляксея Арэшкі, Раісы Жук-Грышкевіч (Жукоўскай),Янкі Жучка,Янкі Запрудніка, Лявона (Леаніда) Карася, Вітаўта Кіпеля, Лаўрына Клыбіка, Міхася Наўмовіча, Барыса Рагулі, Вітаўта Рамука, Міхася Саўкі, Івонкі Іоанны Сурвіллы (Шыманец) і многіх іншых. У кнізе сабраны кароткія біяграфічныя звесткі пра беларусаў, якія былі вымушаны з'ехаць са сваёй краіны. Некаторыя з іх ужо адышлі ў вечнасць. Некаторыя ж да гэтага часу жывуць і працуюць. Дзякуючы ім і беларуская справа, і беларускае слова развіваюцца і квітнеюць там, дзе жывуць сапраўдныя беларусы. (Н.Г.)