Рэлігія, пропаведзі ды служба ў храме толькі тады маюць сваё ўздеянне на чалавека, калі даходзяць да яго свядомасці, калі чалавек разумее тое, што яму кажуць. Старажытная царкоўнаславянская мова, на якой часцяком праходзяць службы ў праваслаўнай святыні не заўсёды зразумелая сучаснаму верніку, бо нашмат адрозніваецца ад мовы, якую карыстае на штодзень. Некаторыя царкоўныя тэрміны і звароты для лепшага зразумення патрабаюць перакладу на сучасную мову. Менавіта такія словы і звароты сабраныя ў “Кароткім слоўніку”. Айцец Сяргей Горбік тлумачыць незразумелыя выразы на больш простую мову, якая трапіць у свядомасць кожнага, нават недасведчанага ў рэлігійных справах чалавека. Тым больш слоўнік набірае вартасці на постсавецкай тэрыторыі, дзе была абарвана нітка пераемнасці, сувязь пакаленняў у рэлігійнай сферы. Грамадства нанова вучыцца малітвам, веры і пакоры. Вяртаецца да Бога і патрабуе зразумення.