Патрэба з’яўлення часопіса, які Вы трымаеце ў руках, наспела даўно. Не сакрэт, што ў беларускай культурнай прасторы менавіта Гародня можа пахваліцца сваёй спадчынай, шматлікімі гісторыка-культурнымі помнікамі, іх мастацкай стылёвай разнастайнасцю, а праведзеныя за апошнія сто год археалагічныя доследы дазволілі прыадчыніць заслону не адной таямніцы нашай багатай даўніны. Паселішча, заснаванае на мяжы 10 і 11 стст. на рачных нёманскіх тэрасах, з цягам часу ператварылася ў магутны горад, які ў 12 ст. Складаўся з замка ды шэрагу раскінутых уздоўж Нёмана і Гараднічанкі гандлёва-рамесных пасадаў (ля Барысаглебскай, Малой і Прачысценскай цэркваў і на Падоле). З гэтага часу паходзяць найстаражытнейшыя помнікі мясцовай архітэктурнай школы – Барысаглебская царква ды іншыя святыні.