Берасьце

Роўна адзінаццаць гадоў таму, напярэдадні Дня Волі і выбараў у тагачасны Вярхоўны Савет СССР, у сакавіку 1989 выйшла ў сьвет першае непадцэнзурнае выданьне Найноўшае гісторыі Берасьцейшчыны: інфармацыйны бюлетэнь «ШЛЯХ» Баранавіцка-Берасьцейскага адзьдзяленьня Беларускага Народнага Фронту «Адраджэньне», які падрыхтавалі Мікола Пракаповіч і Сымон Сьвістуновіч. Сёньня мы бачым, які нялегкі быў гэты шлях як самога выданьня, так і лзодзей, што стаялі ля вытокаў усяго беларускага нацыянальна-вызвольнага руху ў нашым краі. Некаторых, на жаль, ужо няма сярод нас (Уладзімер Базан, Ігар Драгун...). Іншыя, зьняверыўшыся ці стаміўшыся, або, магчыма, па нейкіх іншых прычынах адышлі ад актыўнай працы. Але, без перабольшаньня, самаахвярнасьць гэтых ды іншых тысячаў адраджэнцаў не была марнаю: сёньня мы жывем у незалежнай Беларусі. Наперадзе шмат працы. Ды існуе вечны закон прыроды і жыцьця: стаўшы на Шлях да свае чалавечае й нацыянальнае годнасьці, зрабіўшы першыя крокі, ніколі ня варта спыняцца і адчайвацца, бо інакш - духовая сьмерць і небыцьцё. (Ад рэдакцыі, фрагмент)