Беларуская мова — нацыянальная мова беларусаў, уваходзіць у індаеўрапейскую моўную сям'ю, славянскую групу, ўсходнеславянскую падгрупу. Пашырана ў асноўным у Беларусі. Распаўсюджана таксама і ў іншых краінах, галоўным чынам ва ўсходняй Польшчы, паўднёва-ўсходняй Літве, паўночнай Украіне і заходняй Расіі. Мае афіцыйны статус у Рэспубліке Беларусі, рэгіянальны ў 4 гмінах Падляскага ваяводства і з'яўляецца мовай нацыянальнай меншасці ва Украіне і Чэхіі[3]. Беларуская мова мае шмат агульных граматычных і лексічных уласцівасцей з іншымі ўсходнеславянскімі мовамі (Гл. таксама: Іншыя назвы беларускай мовы і Узаемныя ўплывы усходнеславянскіх моў)