"Экзотыка... Мы чуем гэтае слова, і камусьці ўяўляюцца нетры Амазонкі, камусьці - пустыня Сахара, а хтосьці бачыць непальскія або тыбецкія вяршыні. А я называю свой альбом "Беларуская экзотыка", бо ведаю, што і наша зямля для жыхароў шмат якіх замежных краін неверагодна цікавая. Ды што казаць пра іншаземцаў, калі нават для многіх беларускіх гараджан заснежаная Белавежская пушча або бясконцыя палескія балоты - таксама сапраўдная экзотыка. Не трэба ехаць на бераг Паўночнага Ледавітага акіяна або ў сібірскую тайгу, каб адначасова ўбачыць тысячы птушак, сустрэць статак аленяў або дзікіх кабаноў. Такія мясціны ёсць і ў нас. Трэба проста іх ведаць і мець цярпенне, каб зрабіць удалыя кадры. А яшчэ трэба ўважліва глядзець па баках і сабе пад ногі. Бо вакол столькі дзівоснага!" (С. Плыткевіч)