Дваццатае стагодзьдзе шмат у чым зьмяніла нашае жыцьцё, зрабіўшы яго больш мабільным і віртуальным. Зараз цяжка ўявіць сабе нашае існаваньне без электроннага сеціва. Дарэчы, наш праект таксама пачынаўся й працягвае сваё жыцьцё ў Сеціве (www.praunik.org). Таму ў гэтым нумары мы вырашылі скіраваць ўвагу перадусім на “электроннае” права, то бок на месца сутыку права ды сфэры найноўшых электронных тэхналёгіяў. З аднаго боку, разьвіцьцё Інтэрнэту выклікала да жыцьця новыя формы бізнэсу, але, зь іншага, права не заўжды пасьпявае разьвівацца ўсьлед за грамадзтвам, што спараджае багата актуальных пытаньняў, такіх як, напрыклад, легалізацыя бізнэс-ліставаньня праз Інтэрнэт, разьвіцьцё і абарона аўтарскіх правоў, нядобрасумленная канкурэнцыя і г.д. У гэтым нумары мы зьвяртаемся толькі да некаторых пытаньняў права і Інтэрнэту. Разьвіцьцё электронных тэхналёгіяў ня толькі паўплывала на права, але спарадзіла новыя тэорыі і ў палітычнай навуцы, таму адзін з артыкулаў прысьвечаны праблемам электроннага ўраду.