«Навуковы зборнік», які ўпершыню выдаецца сумесна Беларускім грамадска-культурным таварыствам у Польшчы і Беластоцкім навуковым таварыствам, з'яўляецца трэцім зборнікам прац членаў і супрацоўнікаў навуковага гуртка, які дзейнічае пры ГП БГКТ. Першы публіцыстычна-навуковы зборнік пад загалоўкам «Навукова-літаратурны зборнік і беларускі каляндар 1961» выйшаў у нятрапным спалучэнні навуковага матэрыялу з матэрыялам аднагадовай важкасці. Хаця навуковы і літаратурны матэрыял займае ў ім звыш дзвюх трэціх месца, то ўсё ж каляндарная частка даўно ўжо ўстарэла і памяншае агульную вартасць зборніка. Другі «Навуковы зборнік» быў выдадзены Беларускім грамадска-культурным таварыствам у 1964 годзе. Некаторыя артыкулы і іншыя навуковыя матэрыялы публікаваліся таксама ў паасобкых выданнях «Беларускіх календароў» і ў тыднёвіку «Ніва».