Песьні з народных глыбіняў

Беларускі фальклор - гэта каштоўны духоўны скарб, у якім адлюстраваны багаты народны вопыт, сьветапогляд продкаў, праца, змаганьне, дачыненьні паміж людзьмі, каханьне й нянавісьць. Апошнія носьбіты беларускіх песьняў, казак, паданьняў, замоваў, загадак адыходзяць у нябыт. Зусім мала публікуецца фальклёрных твораў з Гарадзеншчыны. Зьбіраньне й даследаваньне твораў беларускай вуснай народнай творчасьці зьяўляецца важнай задачай у захаваньні духоўнае культуры народа наступнымі пакаленьнямі. Творы, зьмешчаныя ў дадзенай кнізе, уяўляюць сабой пэўную навуковую й нацыянальна-культурную каштоўнасьць. Многія тэксты зьяўляюцца цалкам новымі, малавядомымі альбо ўяўляюць арыгінальны мясцовы варыянт вядомых па іншых раёнах Гарадзеншчыны песьняў. Творы характаразуюцца шырокім спэктрам цікавай тэматыкі, арыгінальнай вобразнасьцю, перадаюцца дыялектныя асаблівасьці гаворкі выканаўцаў.