Да чытача. Гэта ўжо другі зборнік “Творчасьці”, які выходзіць цягам гэтага году. Кожны творца, ці то паэт, ці то пісьменьнік мае патэнцыял, закладзены Госпадам, Творцам усяго існага. Справа чалавека, толькі ў тым, каб адкрыць-адшукаць сваё пакліканьне, каб служыць бліжнім, каб служыць Бацькаўшчыне, Богам дадзенай. У кожным вершы, кожным празаічным творы ёсьць пэўная ідэя. Мы верым у тое, што ніводная ідэя, асабліва выказаная ў творчы спосаб, не зьнікае марна, але робіць сваю работу ў сэрцах і душах людзей. “Літаратура ж, кажучы словамі Антона Луцкевіча,– істота нацыянальнага жыцьця”. Дадзены зборнік даволі рознаплянавы калі казаць пра жанры й стылі – тут прысутныя вершы, эсэі, абразкі, публіцыстыка і гістарычная аповесьць. Задума складальнікаў палягае ў тым, каб сабраць творы блізкія па духу, і мы маем сьмеласьць казаць, што гэта атрымалася. Кожная эпоха, кожная нацыя мае свой адмысловы дух, гэта значыць сьветапогляд, сьветаўспрыманьне ды іхняе выражэньне ў практычным і культурным жыцьці. Творца ж ёсьць той, хто здольны максымальна сьцісла й дакладна выказаць гэты дух і перадаць наступным пакаленьням. Таму мы працягваем праект “Творчасьць” і маем намер гэта рабіць далей. Адметнасьцю гэтага зборніку зьяўляецца наяўнасьць вялікага твору гістарычнай аповесьці Алега Рукаля “На службе князя Радзівіла”, яна будзе друкавацца часткамі”.