Літаратура Беларусі XVIII-XIX стагоддзяў

Планавалася, што ў другі том “Даследаванняў і матэрыялаў”, апрача раздзела Ананімная літаратура, увойдуць тэксты і дакументы, датычныя жыцця і творчасці Яна Чачота, Гераніма Марцінкевіча, Эдварда Жалігоўскага, Аляксандра Ельскага і Альгерда Абуховіча. Аднак спакваля аб’ём першага раздзела павялічыўся на столькі, што давялося адмовіцца ад першапачатковае задумы. Мы палічылі патрэбным засяродзіць увагу на асобных ананімных творах другой паловы XVIII – ХІХ стагоддзяў: “пашпартызаваць” і апублікаваць даступныя нам спісы вядомых тэкстаў. Не ставілася задача ўключыць у том усю беларускамоўную ананімную літаратуру акрэсленага перыяду. Мусім прызнацца: на сённяшні дзень мы не маем у сваім распараджэнні ўсяго корпусу тэкстаў. (Замест прадмовы, фрагмент)