Прэс-фота Беларусі

Гэты альбом стаўся вынікам другога конкурсу «Прэс-фота Беларусі». Мы атрымалі больш за 2000 конкурсных здымкаў за 2010 год ад 72 айчынных фотажурналістаў, супрацоўнікаў дзяржаўных і недзяржаўных медыяў. Пад гэтай вокладкай вы знойдзеце фатаграфіі пераможцаў і некаторых фіналістаў конкурсу ў 8-мі намінацыях: «Навіны», «Людзі ў навінах», «Штодзённае жыццё», «Спорт», «Партрэт», «Мастацтва і забавы», «Прырода» і «Народныя традыцыі» (апошняя рубрыка з'явілася ў конкурсе ўпершыню). Сёлета журы ацэньвала асобна адзінкавыя здымкі і серыі. Мяркуем пакінуць гэтую практыку і надалей. Конкурс прэс-фатаграфіі паўстаў у мінулым годзе. Арганізатарамі выступілі прафесійныя беларускія фотарэпарцёры. За два гады існавання конкурсу здымкі нашых пераможцаў дэманстраваліся ў Мінску, Гродне, Брэсце, а таксама за мяжой - у Маскве, Кіеве, Львове, Кракаве, Варшаве ды іншых гарадах.