Анекдоцік у роцік

Некалі першы наш народны паэт Ф. Багушэвіч — ён жа Мацей Бурачок і Сымон Рэўка з-пад Барысава — прароча сказаў: «Той люд жыве, што свае песні мае!» Перафразуючы гэты крылаты паэтаў афарызм, з такой жа пэўнасцю можна сказаць: «Той люд жыве, што свой гумар мае». Гумар — лекар. Ён адначасова і барометр духу нацыі. Без гумару наша жыццё было б шэрае, невыразнае, панылае. Мабыць, таму гумар у нашым народзе ніколі не зводзіўся. Беларускія фалькларысты запісалі і выдалі тысячы розных жартаў, гумарэсак, анекдотак. Маем мы і свой гумарыстычны часопіс «Вожык». Ды амаль усе нашы перыядычныя выданні друкуюць вясёлыя карацелькі. Прыкладам, газета «Звязда» мае сталы гумарыстычны куточак — «Усміхнёмся».