Свабода (Тут і цяпер)

Перад фінішам І ўлада, і апазіцыя з нецярплівасцю чакаюць заканчэння выбарчай кампаніі-2008 Да дня галасавання застаецца каля тыдня, а апазіцыя ўсё ніяк не можа вызначыцца са сваімі далейшымі паводзінамі падчас выбараў у Палату прадстаўнікоў. Складваецца ўражанне, што нават вядомыя апаненты дзейнай улады хочуць, каб выбарчая кампанія скончылася як мага хутчэй. Пакуль нават у Мінску ні я, ні мае знаёмыя на свае вочы не бачылі ніводнай улёткі з агітацыяй за ўдзел у выбарах альбо супраць. Спецыяльных выпускаў газет апазіцыйнай накіраванасці, прысвечаных выбарам, таксама пакуль няма. Чаму так адбываецца? Ці 14 гадоў суцэльных паразаў апазіцыі зрабілі сваю чорную справу? Ці ўлада зноў ужывае татальны ціск у адносінах да сваіх апанентаў і прапаноўвае гульню без правілаў?