Калі я выйду на волю

У гэтай кнізе вы, верагодна, пазнаеце сябе, нават калі вы не распавядалі мне сваю гісторыю. Кніга складаецца з дзённікавых запісаў, якія я рабіла падчас дзевяці сутак зняволення ў Беларусі ў 2020-м годзе, а таксама інтзрв'ю з тымі, хто ў той самы час, што і я, перажылі міліцэйскі гвалт, арышт, зняволенне. Ёсць тут і галасы нашых блізкіх, якія падтрымлівалі нас падчас зняволення і рабілі для нас, што маглі, па той бок турэмных муроў. Я магу ўявіць, што першая рэакцыя — адмахнуцца ад тых успамінаў, такіх балючых. Не вярэдзіць раны. Але ў гэтай кнізе не ўсё такое цёмнае, наадварот, у ёй шмат падтрымкі і салідарнасці, у ёй цеплыня, у ёй гумар. Гэта кніга — напамін пра найлепшых нас, такіх смелых і аб'яднаных высокімі ідэямі. Мы такімі былі — і мы такімі застаёмся.