Беларусы ў свеце

15 год Першаму з’езду беларусаў свету 8–10 ліпеня 2008 г. споўнілася 15 год з правядзення Першага з’езду беларусаў свету, які адбыўся ў 1993 г. на хвалі беларускага адраджэння. Дзяржава-Беларусь адкрывала для сябе сваю дыяспару. А беларусы-эмігранты радаваліся, што ўпершыню за доўгі перыяд яднанне беларусаў становіцца рэальнасцю. Першы з’езд стаўся сапраўдным Агульнанацыянальным форумам. У ім бралі ўдзел 486 дэлегатаў з усіх кантынентаў свету, 510 – з Беларусі і больш за 200 гасцей. Вялікая зала тэатра оперы і балета ледзь змяшчала ўсіх прысутных. З’езд адбываўся ў святочнай, узнёслай атмасферы. Такога прадстаўніцтва, як на Першым з’ездзе, Беларусь яшчэ не бачыла: кіраўнікі і прадстаўнікі дзяржавы, беларускай грамадскай, культурнай і палітычнай эліты сядзелі поруч з кіраўнікамі і сябрамі беларускіх арганізацый замежжа, абмяркоўвалі і надзённыя праблемы краіны, і якой быць Беларусі заўтрашняй. Гэта знайшло ўвасабленне ў выніковых дакументах: “Зварот да беларускага народу”, “Дэкларацыя аб прынцыпах нацыянальнага дзяржаўнага будаўніцтва”, “Зварот да Парламента і Урада Рэспублікі Беларусь”, “Заява ўдзельнікаў Першага з’езду беларусаў свету па вайсковым пытанні”, рэзалюцыя “Аб падтрымцы дзейнасці ЗБС “Бацькаўшчына”, пастанова “Аб Радзе прадпрымальнікаў”, рэзалюцыя “Аб падтрымцы Беларускай рэдакцыі Радыё “Свабода”, зварот “Да Вярхоўнага Савета Рэспублікі Беларусь “Аб усталяванні мемарыяльнай дошкі на будынку, дзе была абвешчана Беларуская Народная Рэспубліка” і інш.