Прысяга

Харавы дырыжор і кампазітар Галіна Казіміроўская чытае верш "Прысяга" рэпрэсаванага паэта і драматурга Міхася Чарота. Міхась Чарот (сапр. Міхась Кудзелька, 7.11.1896-29.10.1937) - паэт, драматург, празаік, рэдактар, грамадскі дзеяч, стрыечны брат Іосіфа і Івана Кудзелькаў. Адзін з самых славутых і папулярных паэтаў 1920-х гадоў, які таксама не быў чужы беларускай песні. Менавіта ён — аўтар знакамітай «Купалінкі», а яшчэ малады Міхась Чарот сам спяваў у хоры пад кіраўніцтвам Уладзіміра Тэраўскага пры «Беларускай хатцы», быў старшынём тэатральнай суполкі «Маладзік», пісаў п’есы для тэатра, хоць найбольшую вядомасць прынесла яму паэзія. На самым пачатку 1920-х Чарот апублікаваў паэму «Босыя на вогнішчы», якая, фактычна, стала першым значным творам беларускай літаратуры, дзе прыхільна гаварылася пра бальшавікоў. Гэтак жа прыхільна паставіліся да Чарота і ўлады: прызначылі галоўным рэдактарам газеты «Савецкая Беларусь», кіраўніком аб’яднання «Маладняк», увялі ў склад ЦВК БССР. Ні блізкасць да кіраўніцтва ў 1920-я, ні свядомы адыход у цень у 1930-я не дапамаглі Чароту ў часы крывавага тэрору. Разам з многімі беларускімі паэтамі ён быў схоплены і неўзабаве расстраляны ў ноч з 29 на 30 кастрычніка 1937 года.