Права на волю

Урад Беларусі ігнаруе рашэньне ААН Праваабаронца Алесь Бяляцкі атрымаў з офісу Камісарыяту па правах чалавека ААН каментар кампетэнтных органаў РБ у адносінах да меркаваньняў Камітэту па правах чалавека (далей – Камітэт) па паведамленьні А.Бяляцкага. Гэты дакумент дасланы Прадстаўніцтвам РБ пры аддзяленьні ААН і іншых міжнародных арганізацыяў у Жэневе і тычыцца Рашэньня Камітэту па правах чалавека ААН, якое было прынятае ў ліпені 2007 году па звароце старшыні рады ПЦ "Вясна" Алеся Бяляцкага і 10 сяброў арганізацыі ў сувязі з ліквідацыяй грамадзкага аб’яднаньня "Вясна" ў кастрычніку 2003 году. Варта нагадаць, што паводле прынятага Камітэтам Рашэньня, у дачыненьні да А.Бяляцкага і іншых суаўтараў дзяржава-ўдзельніца (РБ) дапусьціла парушэньне арт.22 Міжнароднага Пакту аб грамадзянскіх і палітычных правах. Камітэт рэкамендаваў ураду Беларусі прыняць меры да прававой абароны і згодна з арт. 2, п. 3 (а) Пакту. Акрамя таго, згодна з п.10 прынятага Рашэньня, Камітэт жадаў бы на працягу 90 дзён атрымаць ад дзяржавы-ўдзельніцы інфармацыю аб прынятых мерах, якія былі прынятыя дзеля выкананьня Рашэньня Камітэту. У дадатак Камітэт таксама заклікаў надрукаваць у СМІ высновы Камітэту.