Kryŭja

Гэтым выпускам Цэнтар этнакасмалёгіі «Крыўя» распачынае выданьне новага — як для самога сябе, гэтак і для Беларусі наогул — часопіса. Мэты і накіраванасьць выданьня натуральна вынікаюць зь ягонае назвы. Але некаторыя „ключавыя словы”, безумоўна, патрабуюць невялікага папярэдняга патлумачэньня. Відочна, паколькі выдаўцом часопіса зьяўляецца Цэнтар этнакасмалёгіі «Крыўя», то ў васяродку ўвагі найперш будзе знаходзіцца крыўская этнакасмалёгія. Апошні тэрмін быў абраны для абагульненага азначэньня гэнага праблемнага поля, што натуральна акрэсьліваецца цяпер як вынік інтэграцыі праблемных колаў шэрагу гуманітарных і прыродазнаўчых дысцыплінаў, у тае меры, у якое яны аказваюцца дапасаванымі да „этнакультурнай праблематыкі”. (Ад рэдактара, фрагмент)