Свабода (Тут і цяпер)

«Беларускі тыдзень» у еўропе Еўрапарламент адзначыць 90-я ўгодкі Беларускай Народнай Рэспублікі 10-13 сакавіка ў Страсбургу ў рамках чарговай сесіі Еўрапарламента пройдуць мерапрыемствы ў гонар 90-х угодкаў абвяшчэння Беларускай Народнай Рэспублікі пад назвай «Беларускі тыдзень». Сярод гасцей «Беларускага тыдня» будуць старшыня Еўрапарламента Ганс-Герт Потэрынг, кіраўнік фракцыі Еўрапейскай народнай партыі Джозэф Доўл, кіраўнік камітэту замежных сувязяў Яцэк Сарыюш-Вольскі. Паводле кіраўніка парламенцкай дэлегацыі па сувязях з Беларуссю, польскага дэпутата Яцка Пратасевіча, праграма ўключае паказ фільма рэжысёра Юрыя Хашчавацкага «Плошча», выставы мастакоў Алеся Марачкіна й Рыгора Сітніцы, фатографаў Ігара Крашэўскага і Адама Тухлінскага. Запланаваны таксама выступ гурта Змітра Вайцюшкевіча «W-Z Orchestra». Цягам тыдня адбудуцца дыскусіі й сустрэчы з прадстаўнікамі беларускай грамадскасці, іх прэс-канферэнцыя, а таксама абмен думкамі на тэму «Незалежная Беларусь - неад’емная частка Еўропы».