Навука

Трэба ўсведамляць, што кожная мова – неад’емны атрыбут незалежнасці краіны, фактар кансалідацыі нацыі і гарант гуманітарнай бяспекі, што знайшло адлюстраванне ў Канцэпцыі інфармацыйнай бяспекі краіны. Для Беларусі важнай задачай на перспектыву застаецца стварэнне ўмоў для парытэтнага функцыянавання беларускай і рускай моў ва ўсіх афіцыйных сферах, што цалкам адпавядае прынцыпам дзяржаўнага білінгвізму. Для нас надзвычай важны міжнародны вопыт, асабліва тых краін, дзе існуе некалькі моў: Швейцарыя, Канада, Бельгія, Люксембург, Фінляндыя, Вялікабрытанія і інш. У паведамленнях акцэнт быў зроблены на пашырэнні і падтрымцы беларускай мовы і нацыянальнай культуры, кантактаў з даследчыкамі іншых краін па пытаннях вывучэння моўнай сітуацыі. У гэтым кантэксце вопыт Вялікабрытаніі і меркаванні брытанскіх вучоных з’яўляюцца новымі і цікавымі як у агульнатэарэтычным, так і ў практычным аспектах, што несумненна паслужыць далейшаму развіццю дзяржаўнага двухмоўя і навуковых даследаванняў гэтых працэсаў у НАН Беларусі, а таксама збліжэнню нашых народаў і культур. Удзельнікаў канферэнцыі вітала Пасол Злучанага Каралеўства Вялікабрытаніі і Паўночнай Ірландыі ў Рэспубліцы Беларусь Жаклін Перкінс (на фота). Яна паведаміла, што нарадзілася ў Карнуоле, дзе некалі была свая мова, апошняя носьбітка якой памерла дзвесце гадоў таму. Але мова адрадзілася, і ёсць людзі, якія ёй карыстаюцца. Разам з тым цяжка ўявіць, што корнская мова стане паўсядзённай.