Навука

У Берліне адбылося ўстаноўчае пасяджэнне Беларуска-германскай гістарычнай камісіі. У яе складзе – 16 гісторыкаў з Беларусі і Германіі. Арганізатарамі мерапрыемства з’яўляюцца Нацыянальная акадэмія навук Беларусі і Нямецкае таварыства па вывучэнні Усходняй Еўропы. Камісія створана па ініцыятыве Федэральнага Прэзідэнта Германіі Франка-Вальтэра Штайнмаера і Прэзідэнта Рэспублікі Беларусь Аляксандра Лукашэнкі. Яна фінансуецца са сродкаў Міністэрства замежных спраў Германіі. Дзейнасць камісіі накіравана на паляпшэнне сумеснага даследавання беларускай і нямецкай гісторыі, яе транснацыянальнага кантэксту і гістарычных узаемадачыненняў паміж Германіяй і Беларуссю. Пры гэтым камісія разглядае сябе як генератар ініцыятыў і ставіць сваёй мэтай прыцягненне да гэтай працы суб’ектаў акадэмічнай, пазаакадэмічнай і грамадзянскай супольнасці з розных дзяржаў. Плануецца правядзенне канферэнцый, летніх школ і конкурсу стыпендый для вучоных. Падчас устаноўчага пасяджэння адбыліся экскурсія па Нямецкім гістарычным музеі і сустрэча з удзелам другога сакратара Пасольства Рэспублікі Беларусь у Германіі Сяргея Андрушкевіча, упаўнаважанага МЗС Германіі па Усходняй Еўропе, Каўказе і Цэнтральнай Азіі Міхаэля Зіберта, пасла Рэспублікі Беларусь у Федэратыўнай Рэспубліцы Германія Дзяніса Сідарэнкі, пасла Федэратыўнай Рэспублікі Германія ў Рэспубліцы Беларусь Манфрэда Хутэрэра ды інш.