Слонімскі край

Фотаздымкі Слоніма, зробленыя ў гады Першай сусветнай вайны, працягваюць з’яўляцца на інтэрнэт-аукцыёнах. Нядаўна жыхар бельгійскага Гента прадаваў іх на ebay.com аж некалькі дзесяткаў! У апісанні пазначана, што гэта Слонім і наваколле. Многія аб’екты пазнавальныя, як былыя касцёл і кляштар бернардзінцаў (цяперашні Свята-Троіцкі сабор і будынак інтэрнату), касцёл св. Андрэя, Гандлёвая плошча, Гандлёвыя рады, канал Агінскага. Фатограф зафіксаваў не толькі нямецкіх салдат, але і слонімцаў — гараджан і вяскоўцаў. Яны працуюць, гандлююць, проста пазіруюць перад аб’ектывам камеры. Фатограф здымаў не толькі ў цэнтры горада, але і на ўскраінах. На фота ёсць маленькія драўляныя жылыя дамы, разнастайныя гандлёвыя кропкі, тагачасны аўтатранспарт. На жаль, гісторыя гэтай калекцыі невядомая. Магчыма, яна ўваходзіла ў альбом вайскоўца, які служыў у Слоніме і захаваў здымкі, як памятку.