Каталіцкі веснік

Прымус да парушэння таямніцы споведзі – непрымальны і абмяжоўвае свабоду рэлігіі, гаворыцца ў спецыяльным лісце Святога Пасаду. Ён быў абнародаваны 1 ліпеня 2019 г. у Ватыкане. Дакумент пад назвай “Заўвага Апостальскай Пенітэнцыярыі пра важнасць унутранай сферы і непарушнасці таямніцы споведзі” быў апублікаваны за подпісам кардынала Маўра П’ячэнцы – Вялікага Пенітэнцыярыя, і мансеньёра Кшыштафа Нікеля – Рэгента Апостальскай Пенітэнцыярыі. Папа Францішак зацвердзіў дакумент 21 чэрвеня гэтага года. Прадстаўляючы дакумент, кардынал П’ячэнца заўважыў, што ў сучасным “медыйным” грамадстве развіццю тэхналогій і сродкаў камунікацыі “не спадарожнічае аналагічнае імкненне да пошуку праўды”. Мэтай хутчэй з’яўляецца “ліхаманкавае жаданне пашырэння інфармацыі”, у тым ліку прыватнай і канфідэнцыяльнай. На яе падставе фарміруецца меркаванне пра людзей, нярэдка ачарняецца іх добрае імя. Такі распаўсюджаны падыход адбіваецца таксама на Касцёле, ад якога “ў імя меркаванай карэктнасці і празрыстасці” патрабуецца выкарыстанне прынцыпаў, што ўжываюцца ў грамадзянскім праве. У гэтым кантэксце Апостальская Пенітэнцыярыя лічыць неабходным падкрэсліць “абсалютную непарушнасць таямніцы споведзі”, якая “заснавана на Божым законе” і не дапускае выключэнняў.