Хрэстаматыя па старажытнай беларускай літаратуры

Багатая літаратурная спадчына беларускага народа эпохі феадалізма яшчэ мала даследавана і вывучана. Значнай перашкодай гэтаму з’яўляецца тое, што помнікі старажытнай літаратуры раскіданы па розных архівах і бібліятэках па-за межамі Беларусі, а дакладнага бібліяграфічнага даведніка, які паказваў бы месца знаходжання іх, яшчэ няма. А між тым многія з гэтых помнікаў засталіся ў рукапісах да нашага часу. Тыя ж з іх, якія апублікаваны на старонках перыядычнага друку другой палавіны XIX і пачатку XX ст.ст., галоўным чынам у навуковых зборніках і манаграфіях, даўно ўжо сталі бібліяграфічнай рэдкасцю і аказаліся маладаступнымі нават для навуковых супрацоўнікаў. У вельмі цяжкім становішчы апынуліся выкладчыкі і студэнты ВНУ, дзе вывучаецца курс гісторыі беларускай літаратуры. (Прадмова, фрагмент)